Innan ríkisstjórnar Donalds Trump, forseta Bandaríkjanna, er til skoðunar að mynda sérstakan sjóð. Hann á að nota til að greiða pólitískum bandamönnum forsetans skaðabætur vegna rannsókna á meintum glæpum sem þeir stóðu frammi fyrir í tíð ríkisstjórnar Joes Biden. Í flestum tilfellum sneru þessar rannsóknir að tilraunum Trumps og bandamanna hans til að snúa úrslitum forsetakosninganna 2020.